بحبها مظبوطة

موضوع: بحبها مظبوطة الأحد أبريل 04, 2010 2:48 pm

بحبها مظبوطة

مش سادة

تمرر زماني

ولا زيادة

تجيب المرض

مش سادة

تعكر مزاجي

ولا زيادة فوق الغرض

مظبوطة زي الكتاب

صفحة الحلويين

عنوانها على كل باب

الطيبة بين سطرين

بحبها مؤدبة

محجبة

تفهمني من عيني

بنظرة تواسيني

ونظرة تهنيني

ونظرة تحاجيني

وتقوللي لأ غلطان

تقنعني بالبرهان

وتحترم أفكاري

وتقرا أشعاري

تناديني يا انسان

بحبها مظبوطة

مش سادة مكبوتة

بعقدها مربوطة

تخنقني م العنوان

بحبها مظبوطة

مش زايدة مفروطة

ولا راسها مخبوطة

في صورة بالألوان

بحبها مظبوطة

مش سادة مكشرة

ولا كئيبة محجرة

محشورة في الأحزان

بحبها مظبوطة

مش زايدة ع المعقول

مش آيدَة نور على طول

واخداني قدوة كمان

بحبها مظبوطة

ماحدش يفهم غلط

دي قهوتي يا شباب

دي قهوتي الكتكوتة

نقطة في خط الوسَط

ده خطي في كل كتاب